Dili angay mabalaka ang publiko ilabina ning syudad sa Cagayan de Oro kay aduna kini igong supply sa bugas bisan pa man kon adunay pagsaka sa presyo.

 

Kini human nagpahigayon og hiniusang monitoring ug pakisusi sa pipila ka bodega sa bugas ang Cagayan de Oro City Price Coordinating Council (CDO CPCC); City Councilor George Christopher Goking, chairman sa Committee on Trade and Commerce; Department of Agriculture (DA-10); National Food Authority (NFA-10); Department of Trade and Industry (DTI); City Agriculture Office; Bureau of Plants and Industry (BPI); Bureau of Customs (BOC) ug uban pa nga mga ahensya.

 

Gipasabot usab sa usa sa mga wholesaler/importer sa bugas nga walay hoarding o pagtago sa bugas kay pag-abot sa ilang stock kuhaon dayon kini sa ilang mga customers.

 

Ug dili mahimo nga magtago og bugas gumikan kay mausab na ang quality niini inig abot sa unom ka bulan.

 

Samtang, gipadayag ni DA Regional Executive Director Jose Apollo Y. Pacamalan nga ang hinungdan sa pagsaka sa presyo sa bugas dinhi sa syudad mao nga tingtanom na usab sa mga local farmers.

 

Gawas niini, temporary usab nga gisuspenso ang pag-import sa milled rice sama sa Alas, Princess Bea ug Young Chow sugod niadtong bulan sa Septiyembre hangtod ning bulan sa Disyembre.

 

Hinuon, adunay alternatibo nga imported rice ang mapalit sama sa Japonica, Glutinous ug Basmati nga ubos ang presyo.

 

Apan gipasalig sa DA nga sa Enero 2026, mabalik na ang pag-import sa gi-ban nga mga bugas. (ALR/CIO/Photos by Kim Zaldivar/CIO)