GIKLARO sa syudad ang isyu kabahin sa leptospirosis sa merkado sa Cogon ug gideklarar nga case closed na kini atol sa gipahigayon nga press conference sa buhatan sa City Information Office, adlawng Miyerkules, Enero 21, ning tuiga.

 

Kini human mikaylap ang alegasyon sa 10 ka kamatayon nga giingong nalambigit sa leptospirosis sa Cogon Public Market.

 

Gipasabot nila City Council Health Committee Chairperson Councilor Paolo Nicolo Gaane, Acting City Information Officer Jade Adeser, City Economic Enterprises Business Development Administration (CEEBDA) Head Atty. Marianne Raagas, ug City Health Officer-in-Charge Dr. Claire Paglinawan ang maong alegasyon ingon man kamahinungdanon sa saktong impormasyon ingon man kooperasyon sa katawhan.

 

Matod ni Dr. Paglinawan, walay kaso sa kamatayon ang nakumpirmang nalambigit sa leptospirosis nga natala sa ilang buhatan ug wala kini medical basis nga nagpakita nga leptospirosis ang hinungdan sa ilang pagkamatay.

 

Ang mga kasong gilangkuban sa alegasyon adunay lain-laing medical causes nga walay kalabutan sa maong sakit.

 

Subay niini, gidasig usab ang publiko nga maglikay sa pagtuo ug pagpakalat sa walay basihanan nga impormasyon ug magpaabot lamang sa opisyal nga pahayag gikan sa lokal nga kagamhanan. (MDS/Photos by Rod Constantino/CIO)