MIKABAT sa 748 ang nakabenepisyo sa Barangay Bugo sa gipahigayong People’s Day Program sa katapusang Lunes sa bulan sa Enero ning tuig sa pagpangulo ni Mayor Klarex Uy.

 

Gisugdan ang maong kalihokan sa usa ka flag-raising ceremony nga gipangulohan ni Punong Barangay Spencer Cailing, kauban ang mga miyembro sa Barangay Bugo Council ug staff.

 

Nagpahayag si Cailing sa iyang pasalamat tungod kay gidala ang People’s Day Program sa ilang barangay, hinungdan nga nadungog mismo ni Mayor Klarex ang mga panginahanglan ug kabalaka sa katawhan.

 

Mipadayeg usab og dakong pasalamat ang Zone 8 Cabag-asan Homeowners Association, Inc. kang Mayor Klarex Uy alang sa Cabag-asan and Sambag Bugo Electric Power Project (CEPALCO) tungod sa paghatag og kahigayonan nga makakutay og kuryente ang kapin 1,700 ka panimalay niini.

 

Kauban ang mga department managers sa City Hall, gipaabot sa Barangay Bugo ang susamang kalidad sa serbisyo sama sa libreng medical check-up ug tambal, libreng lima ka kilo nga bugas gikan sa pamilyang Uy, wheelchair assistance, tabang sa pagproseso sa business permit, ug pag-atubang sa mga pangutana may kalabotan sa scholarship, late birth registration, job application, ug uban pa.

 

Mitambong usab sa maong kalihokan ang mga miyembro sa city council nga sila City Councilors Gigi Go, Alam Lim, Eric Salcedo, Paolo Gaane, ug Edgar Cabanlas.�(DYM/Photos by Jhoanne Abejo/CIO)