MIHIMO sa iyang public apology si Cogon United Market Vendors Association (CUMVA) President Franklin Dagcota kalabot sa iyang Leptopirosis issue nga gikamatay sa mamaligyaay sa Cogon Public Market.

 

Ang iyang pagpangayo og pasaylo natigayon atol sa committee hearing nga gipahigayon adlaw’ng Martes, Enero 27, nga gipangulohan ni Councilor Paolo Nicolo Gaane, chairman sa City Council Committee on Health and Health Insurance, mahitungod sa giingong mga kaso sa leptospirosis sa syudad.

 

Personal nga nangayo og pasaylo si Dagcota tungod sa iyang paghatag og walay basehang pahayag nga adunay napulo (10) ka vendors sa Cogon Market nga namatay tungod sa leptospirosis.

 

Iyang giangkon nga nagpadala siya og sulat ngadto sa city council bisan og wala pa kini masuta ug mapamatud-an kung leptospirosis ba gyud ang hinungdan sa maong kamatayon.

 

Sa committee hearing, giklaro nga fake news ang giingong kaso sa leptospirosis sa Cogon Market tungod kay wala kini’y factual nga ebidensya ug opisyal nga dokumentasyon.

 

Gideklara usab sa Department of Health (DOH) sa pagpangulo ni Dr. Sulpicio Henry Legaspi Jr., nga walay reported nga kaso sa leptospirosis sa syudad.

 

Giingon usab nga dili leptospirosis ang diagnosis sa mga namatay nga mga pasyente nga unang gisuspetsahan nga biktima sa maong sakit.

 

Nitambong sa hearing ang mga miyembro sa 21st City Council, lakip si Acting City Information Officer Jade Adeser, City Economic Enterprises and Business Development Administration (CEEBDA) Manager Atty. Marianne Ragas, City Health Officer-in-Charge Dr. Claire Paglinawan ingon ang Department Health-Center for Northern Mindanao.

 

Gipahinumdoman usab ang tanan nga ang pagpagawas og dili verified information mahitungod sa sakit supak sa Republic Act No. 11332, o ang Mandatory Reporting of Notifiable Diseases and Health Events of Public Health Concern Act, nga nagmando sa husto ug responsableng pagreport sa mga kaso sa panglawas. (MDS/Photos by Iren Fuentes/CIO)