MAPASALAMATON ang 817 ka molupyo sa Brgy Mambuaya ug kasikbit nga mga dapit sa gidala’ng People’s Day program ni Mayor Klarex Uy adlaw’ng Lunes, Pebrero 9 nga gipahigayon sa Mabuaya Covered Court.

 

Kini nga talagsaon nga one-stop shop service ni Mayor Klarex nagtumong nga mahatagan og kasayon ang katawhan ilabina nga gidala na niini ang tibuok serbisyo sa city hall sa ilang tugkaran.

 

Gisugdan ang programa sa usa ka flag raising ceremony nga gipanguluhan ni Punong Barangay Philip S. Porras uban sa mga miyembro sa Mambuaya Barangay Council ug barangay staff.

 

Nagpahayag usab si Porras sa iyang pagpasalamat kang Mayor Klarex sanglit napasayon ug dili na kinahanglan moadto sa syudad ang katawhan sa iyang barangay alang sa mga serbisyo.

 

Uban sa mga kawani sa matag departamento sa City Hall, direkta nga gihatag ang tabang ug serbisyo sa matag residente sa Mambuaya lakip ang libreng medical check-up ug tambal, libreng lima ka kilo nga bugas gikan sa pamilyang Uy ug lollipop para sa mga bata, arozcaldo ug champorado, wheelchair assistance, tabang sa pagproseso sa business permit, ug pag-atubang sa mga pangutana nga may kalabotan sa scholarship, late birth registration, job application ug lain pang frontline services.

 

Gitambongan usab sa mga sakop sa 21st City Council nga sila Kosnehal Al Legaspi, Jing Daba, George Goking, Antuy Pascual ug Des Dahino ang maong kalihokan isip pagsuporta sa programa ni Mayor Klarex. (DYM/CIO Photos by Roel Felicitas and Harry Tibon)