World Health Organization
Department of Health 
GIHUGTAN pa sa Regulatory Compliance Board inabagan sa Police Station 4 ning dakbayan ang pagpatuman sa mga gabayan kalabot sa social distancing, barangay exit pass, ug pagsuot sa face mask ug face shield sulod sa pampublikong sakyanan.
Atol sa usa ka RCB operation diha sa Brgy. Carmen, nasapon ang pipila ka mga driver sa PUJ ug motorela kinsa nagpasakay og pasahero nga lapas sa maximum capacity nga gimando sa otoridad, ingon man nakalapas kini sa social distancing policy.
Nasikop usab ang ubay-ubay ka mga pasahero kinsa nasayran nga walay barangay exit pass nga maoy gikinahanglan dal-on kung mogawas sa tagsa-tagsa ka panimalay alang sa mga ‘essential’ nga lakaw.
Lakip usab nga na-isyuhan sa Ordinance Violation Receipt (OVR) ang mga indibidwal nga nasapon nga wala nagsuot og face mask ug face shield sulod sa pampublikong sakyanan nga istriktong gimando sa lokal nga kagamhanan inubanan sa mga ahensya sa gobyerno nasyonal.
Ang maong mga kalapasan adunay silot sa City Ordinance No. 13855 o’ Community Quarantine Guidelines sa dakbayan diin mahimong mag-community service ang mga masapon nga nakalapas niini o’ magbayad sa multa. (SPP/ Photos by Reynan Baylin)
