Anaa na lang sa two-digit ang bag-ong mga kaso sa Covid-19 nga gakatala sa Cagayan de Oro sa milabay’ng pipila ka mga adlaw.

Sukwahi kini sa bulan sa Agosto paingon sa tunga-tunga sa Septiyembre diin nakasinati ang syudad sa pagtaas sa mga kaso nga moabot sa tag-usa ka gatos hangtud sobra 150 ka mga kaso ang gakatala matag adlaw.

Atol sa daily presser ni Mayor Oscar Moreno niadtong Martes, gitaho sa mayor nga mikanaog na ngadto sa 44.57 ang average daily cases sa Cagayan de Oro gikan sa 151 niadtong Agosto 16.

 

 

Miubos na usab ang average weekly cases sa syudad ngadto sa 312 ka mga kaso pag-abot sa Septiyembre 27 gikan sa 1,060 niadtong Agosto 16.

 

Gani man, gipaubos na sa ‘moderate risk’ ang average healthcare utilization rate kon HCUR sa Cagayan de Oro as of September 26 human mitala ang syudad og 69.18 percent average HCUR.

Lakip usab sa mga datos nga mikanaog mao ang -48 percent sa two week growth rate, 56.98 percent sa isolation bed, ug 66.67 percent sa mechanical ventilator. (IAF/CIO)