TALIWALA sa nasinati nga pandemya sa nasud, nagpadayon ang serbisyo sa city health office ilabina sa paghatag og bakuna sa mga bata sa tinguha nga protektado sila sa uban pang mga sakit.

 

Gani man, nagpagula usab ang Department of the Interior and Local Government (DILG) bag-ohay lamang og usa ka memorandum alang sa local government units isip guidelines sa pagpahigayon og community based MR-TD-HPV immunization panahon sa pandemya basi usab sa Department of Health Memorandum Order No. 2021-0383.

 

Nalatid sa maong memorandum ang istriktong pagsunod sa minimum public health standards sa pagpahigayon og community based immunization aron malikayan ang pagkuyanap sa COVID 19 virus.

 

Kahinumdoman nga mahinugdanon ang paghatag og Measles-Rubella (MR), Tetanus-diptheria (TD) ug Human Papillomavirus (HPV) vaccines sa kabataan ilabina ning panahon sa pandemya aron malikayan ang uban pang mga sakit.

 

Gani man, gidasig ang mga LGUs sa maong memorandum sa pakigtambayayong sa pribadong sector ingon man sa Department of Education sa pagpahigayon sa maong katuyoan.

 

Samtang una nang gipahibalo ni Dr Ted Yu Jr, medical officer sa City Health Office nga padayon ang paghatud sa ilang serbisyo diha sa mga barangay health centers alang sa mga bata nag edad og 0 hangtud sa 9 ka bulan ug kadtong mga anaa na sa school age (6-7 yrs old) ug adolescent children (12-13 yrs old). (ACM/CIO)