APROBADO na ni Mayor Oscar Moreno ang gabayan alang sa mga menor de edad, vulnerable group ug differently-abled persons nga buot mosulod sa mga malls ug shopping centers dinhi sa dakbayan.

Ubos sa bag-ong gabayan, mahimo nang mosulod sa malls ug shopping centers ang mga indibidwal nga nag-edad 18 anyos paubos apan kinahanglan nga ubanan sila sa mga adults o hingkod na ang panuigon.

Apan gibawal pa usab ang pagpasulod sa mga menor de edad sa maong establisemento panahon sa school days ug school hours ug mga oras nga gigahin alang sa ilang pagtubag sa mga modules sa eskwelahan.

Mahimo usab makasulod ang mga bata sa amusement centers ug arcades apan gidili pa gihapon ang pagdula sa video games sa mga internet cafes.

 

Kinahanglan gihapon nga moagi sa screening process ang mga menor de edad sa dili pa mosulod sa malls ug shopping ceters sama sa pagkuha sa temperature, social distancing ug pagsuta sa uban pang rekisitos.

Ang mga nag-edad 65 anyos pataas, ug kadtong adunay immunodeficiencies, comorbidities, health risks, differently-abled persons ug mabdos kinahanglan nga fully vaccinated aron matugotan sa pagsulod sa mga establisemento.

Dili na usab kinahanglan magdala og Barangay Exit Pass (BEP) atol sa pagawas sa panimalay apan padayon gihapon nga ipatuman ang palisiya sa Higala App QR Code system.

Apan angay hisayran sa katawhan nga ang maong mga gabayan ipatuman sa lokal nga kagamhanan kung anaa sa Alert Level 2 ang status sa dakbayan pinasubay sa deklarasyon sa nasudnong kagamhanan. (SPP/CIO)