GI-IMBESTIGAHAN karon ang mga establisemento kinsa matud pa mipatuman og mga kondisyon sa pagpalit og alcohol sama sa 'minimum amount of purchase' ug 'package deal' diin mapugos ang mga konsumidor nga mopalit na lang sa mga items bisan supak sa ilang kagustohan.

Kini human misumbong sa City Price Coordinating Council ang pipila ka mga konsumante kinsa giingon nga nakapalit lamang og alcohol human mipalit og mga sabon isip 'package' niini.

Sa laing bahin, adunay midangop nga mga konsumante sa CPCC tungod sa gi-implementar niini nga 'minimum amount of purchase' kon kantidad nga angay mabayran sa konsumante para matugotan nga makapalit og alcohol.

Sigun pa ni Atty. Jose Edgardo Uy, co-chair sa CPCC, dili puwede nga but-an ang mga konsumante sa ilang mga paliton nga grocery items kay ila kining katungod, ug dili usab angay mosakay sa panahon ang mga establisemento ning panahon sa krisis.

Sa kasamtangan, gipaabot na kini sa CPCC ngadto sa Department of Trade and Industry (DTI) kinsa adunay otoridad nga mandoan ang mga establisemento nga dili na ipadayon ang maong kondisyon sa pagpalit kay kini nakalapas sa 'consumer rights'.

Mipahimangno usab si Atty. Uy nga dili angay mabalaka ang mga konsumante sa dakbayan kay padayon ang pagpaningkamot sa lokal nga kagamhanan inubanan sa mga ahensya sa gobyerno nasyonal ug mga organisasyon nga ma-'regulate' ang presyo sa palaliton ug walay pang-abusar nga mahitabo kabahin sa pagpamaligya og 'basic commodities'.

By Spencer Palen | Photos by Reynan Baylin