SINGKWENTA ka mga representante sa transport groups ning syudad ang gi-edukar kalabot sa kamahinungdanon sa 'disinfection' aron batokan ang COVID-19.

Ang maong panagtapok bag-ohay lang gipangulohan sa Roads and Traffic Administration (RTA), City Administrator’s Office, kauban ang City Health Office.

Gi-edukar ni Dr. Jan Sherwin Samong sa CHO-Health Emergency Management System ang mga operators/drayber kalabot sa importansya sa 'disinfecton' sa mga sakyanan isip precautionary measure sa pagkatag sa maong sakit aron luwas ang sumasakay, ingon man ang mga drayber.

Nunot niini, magpahigayon og laing tigom ang nasangpit nga grupo aron matudloan sa Sanitary Inspection team sa CHO kalabot sa proseso o paghimo sa alternatibong 'disinfection chemical'.

Miapila usab si Dr. Samong nga suportahan ang mga medical/health workers nga frontliners sa pakigbatok sa COVID-19 pinaagi sa dili pagbalibad kung buot niining mosakay, ilabina kadtong mga nakasul-ob og uniform sa ospital.

Sa maong tigom, gihangyo usab sa representante sa City Police Office kon COCPO nga pahimuslan ang paggamit sa 'group chats' alang reporting ug monitoring.

By Archie Pagayaman / photo by Roel Felicitas