TALIWALA sa posibleng risgo nga gi-atubang sa 'disinfection team' sa dakbayan, padayon gihapon nga nagserbisyo ang pipila ka mga empleyado sa City Hall kinsa kamulo nga ga-disinfect karun sa kadalanan.

Wala na miila sa oras ning mga miyembro sa maong grupo para lamang masiguro ang kahinlo sa komunidad pinaagi sa pag-'spray' sa 'disinfenctant solution' ngadto sa 'public areas'.

Bisan pa man og gapas-anon nila ang gibug-aton sa 16 ka-litros nga 'solution' sa matag-container, wala kini nahimong rason arun moundang sila sa pagsugpo sa maong virus.

Ang maong kalihokan sa lokal nga kagamhanan usa lamang sa ubay-ubay ka mga 'precautionary measures' nga gimando ni Mayor Oscar Moreno kinsa gihimong prayoridad ang luwas nga panlawas sa matag indibidwal sa dakbayan.

Padayon nga ipahigayon ang 'water flushing' ug 'disinfection' dinhi sa dakbayan hangtod mawagtang ang COVID-19 bisan pa og gakaabtan sa kadlawon ang operasyon niini para makalikay ang tanan sa mga sakit nga dala sa maong 'virus'.

(By Spencer Palen | Photos by Aicy Soriano)