Monday, 23 March 2020 03:22

Stress debriefing, medical clearance rekisitos ayha makabalik-trabaho ang 40 ka NMMC personnel nga gipaubos sa quarantine

Written by

STRESS debriefing o psychological counseling ug medical clearance ang duha ka rekisitos aron makabalik sa trabaho ang 40 ka mga health ug non-health personnel sa Northern Mindanao Medical Center.

Kini ang giklaro ni Dr. Jose Chan, Medical Director sa NMMC atol sa daily press briefing sa Mayor's Office, City Hall, Marso 23 ning tuig.

"Mo-report na sila ugma (Marso 24) kung aduna na sila’y medical clearance nga fit to work na sila. Ikaduha, nahuman na sa counseling sa psychiatrist ug psychologist before sila mobalik og trabaho", saysay ni Dr. Chan.

Kahinumduman nga gipaubos sa kwarantinas ang nasangpit nga mga personahe human nagpositibo sa COVID-19 ang usa ka pasyente gikan sa Lanao del Sur diin namatay na usab kini niadtong Marso 13.

Nasayran karong adlawa (Marso 23) mahuman ang pag-quarantine sa maong mga personnel.

Sa laing bahin, gibutyag ni Dr. Chan nga adunay 24 ka isolation rooms ang gigahin sa ospital alang sa mga pasyente nga gi-obserbahan sa COVID-19. Samtang 10 niini ang kasamtangang gi-okupar sa mga persons under investigation (PUIs), kinsa naghulat na lang sa resulta.

Gidugang usab ni Dr. Chan nga sa pagkakaron igo pa ang Personal Protective Equipment (PPE) alang sa mga doktor, nurses o kinsa pang direktang ga-atiman sa PUIs.

Mapasalamaton usab kini sa mga nagdonar og PPEs sa ospital, apan giangkon usab niini nga dili kini moigo kon ugaling mosaka pa ang ihap sa mga pasyente nga obserbahan sa COVID-19.

Kahibaloan nga hugot nilang gitamod ang pagsul-ob sa mga frontliners og PPEs. Hinuon, napaabot na kini nga concern sa Department of Health.

 

By Archie Pagayaman / Photo by Jomar Figuracion