Aron molambo ang produksyon sa agrikultura ug mosaka ang panginabuhian sa mga mag-uuma, nagpahigayon og usa ka komprehensibong inisyatiba ang syudad ubos sa administrasyon ni Mayor Rolando `Klarex’ Uy pinaagi sa Agricultural Productivity Operations Office (APOO).

 

Mokabat 18 ka mga cacao farmers nga mga miyembro sa Bayanga Integrated Social Forestry Farmers Association (BAISFFA) sa Midkiwan, Barangay Bayanga ang mipailawom og duha ka semana nga Farmers Field School (FFS) on Cacao Production bag-ohay lang.

 

Sa maong mga adlaw, gitudloan ang mga mag-uuma kalabot sa pruning o pul-ong, usa ka mahinungdanong pamaagi sa pagpausbaw sa abot ug kalidad sa cacao.

 

Gihatagan usab sila og bililhon nga pagsabot ug praktikal nga mga demonstrasyon, insaktong kahanas aron ma-optimize ang ilang pagtikad sa cacao.

 

Lakip sa gitudlo kanila ang fertilizer ug nutrient management, mga aspeto sa pagpatunhay sa himsog nga produksyon sa cacao ug pagpadako sa abot sa ani, ingon man mga giya ug epektibong pamaagi aron masiguro nga tambok ang yuta ug nutrisyon sa tanum.

 

Naglaum ang syudad nga pinaagi niini, mosaka pa ang sektor sa agrikultura ug mousbaw ang kinabuhi sa mga Kagay-anon ilabina nga suportado ni Mayor Klarex ang mga programa sa agrikultura. (ALR/CIO/Photos from APOO)