TALIWALA sa giatubang nga hagit sa panubig ning syudad, gihingusgan sa kagamhanang lokal ubos sa administrasyon ni Mayor Rolando “Klarex” Uy ang pagsiguro nga mahatagan og saktong serbisyo ug malikayan ang kahasol sa adlaw-adlaw nga panlihok sa katawhan diha sa pagtinabangay ilabina sa mga opisyales sa barangay.

 

Kini human nakigtagbo ang LGU CDO sa pagpangulo ni Chief of Staff Ms. Sheila Lumbatan, kauban si City Disaster Risk Reduction and Management Department head Nick Jabagat sa mga volunteers ug ahensya sa gobyerno nga moabag sa pagdala sa serbisyo sa panubig.

 

Gipasabot ni Lumbatan nga dako og kaakohan ang coordination sa barangay officials diha sa paghatud sa tubig sa mga apektadong barangay ilabina sa mga nahimutang sa Distrito 1 nga maoy dakong apektado sa panubig.

Matud usab ni Jabagat nga ang barangay maoy moplastar sa “prioritization” ilabina sa mga ‘vulnerable sectors’ mas nanginahanglan.

 

Subay niini, giaghat pa gihapon ang katawhan ilabina sa Distrito 1 nga magsalod ug magtigom og tubig sugod karong adlawa.

 

Dugang ni Jabagat nga dako ang pasalamat usab ni Mayor Klarex sa suporta nga gisaad sa tibuok rehiyon kon ugaling adunay kakulangon nga masinati sa syudad diha sa paghatud og serbisyong panubig.

Apan bisan pa man niini, nanghinaot pa gihapon si Mayor Klarex nga masulbad ra ang maong hisgutanan ug dili na mosangpot sa pagkawala sa tubig. (ACM/CIO Photos by KIM ZALDIVAR)