GIMANDO ni Mayor Rolando “Klarex” A. Uy sa Incident Management Team (IMT), pinaagi sa Executive Order 196-2024, ang paghimo og rapid damage assessment and needs analysis (RDANA) sa posibleng epekto sa pagputol sa supply sa tubig sa Cagayan de Oro Bulkwater Inc. (COBI) ngadto sa Cagayan de Oro Water District.

 

Lakip sa gimando ubos sa EO 196-2024 ang pagpatuman sa contingency plan ubos sa pagdumala sa IMT ang giduso nga plano sa Cagayan de Oro Special Task Force for Water Supply and Distribution sa mga kabarangayan nga apektado sa pagkawala sa supply sa tubig.

 

Ang maong kamandoan subay usab sa pagpaubos sa Cagayan de Oro ubos sa State of Emergency nga gideklara ni Mayor Klarex adlaw’ng Miyerkules, Mayo 1.

 

Tumong sa kamandoan ni Mayor Klarex nga mapanalipdan ang katungod sa katawhan sa syudad sa panginahanglanon sa tubig.

 

Nasayran nga pila ka bulan na ang panaghisgot tali COWD ug COBI kalabot na sa ilang gipirmahang kontrata sa pag-supply og tubig sa Cagayan de Oro apan wala pa’y nakab-ot nga kasabotan. (ACM/CIO Photos ROD CONSTANTINO)