DAKONG kalipay ang gibati sa mga empleyado sa City Hall human gipahibalo ni Mayor Klarex Uy nga retroactive sugod Enero ning tuig ang 3rd tranche salary standardization atol sa pinakaunang flag raising ceremony sa iyang administrasyon, Hulyo 4, 2022.

Matud ni Mayor Klarex nga angayan lamang hatagan sa omento sa ilang suholan ang mga empleyado sugod Enero 2022 human gipatuman ang 3rd tranche Salary Standardization Law ug kini gisugdan ang implementasyon niadtong Hunyo ning tuig.

 

Dugang pa sa mayor nga mokabat sa P66 milyones ang gikinahanglang budget alang sa lima ka bulan nga salary differential kon sugod bulan sa Enero hangtud Hunyo ning tuig.

Lakip sa misalmot sa flag raising ang mga sakop sa 20th City Council sa pagpangulo ni Vice Mayor Jocelyn Rodriguez. (ACM/CIO)