MIGRADWAR ang 100 ka mga benepisyaryo sa JobStart Philippines Wave 7 niadtong Hulyo 1 human mipailawom sa 10-day Life Skills Training nga gipangulohan sa Department of Labor and Employment – Cagayan de Oro City Field Office, inabagan sa lokal nga kagamhanan pinaagi sa Public Employment Service Office.

 

Atol sa kalihukan, gipaabot ni Mayor Klarex Uy, City Councilor Girlie Balaba ug mga kadagkuan sa DOLE ang ilang hingpit nga suporta ngadto sa mga benepisyaryo pinaagi sa ilang tagsa-tagsa ka mensahe.

Gipasidunggan usab ang mga ‘JobStarters’ kinsa mipakita sa ilang lain-laing abilidad ug mga pasidungog nga gilangkuban sa ‘Leadership Award’, ‘Model Jobseeker Award’, ug ‘Most Improved Jobseeker Award’.

 

 

Nahimong posible ang pagpahigayon sa maong pagbansay pinaagi sa ‘blended learning modality’ diin misalmot ang mga benepisyaryo sa ‘online’ ug ‘face-to-face’ nga klase diha sa Saint Mary’s Academy of Carmen sulod sa napulo ka adlaw.

Human sa graduation rites, gipahigayon ang JobStart Wave 7 Job Fair alang sa mga ‘JobStarters’ aron masayran nila ang kompanya diin mopailawom sila sa ikaduhang ‘phase’ sa programa nga mao ang ‘Technical Training Phase’, ug kini pagasundan sa ‘Internship Phase’ aron makumpleto ang kinatibuk-ang JobStart PH Wave 7.

 

Tumong sa JobStart PH nga matabangan ang mga kabatan-onan sa dakbayan nga mas mapadali ang pagpangita og trabaho ug mahimong andam nga mahimong empleyado sa nagkadaiyang buhatan pinaagi sa mga pagbansay ug paghatag og allowance samtang mipailawom sa maong programa. (SPP)