Mipaabot si Mayor Rolando ‘Klarex’ Uy sa iyang kasub-anan ngadto sa pamilya ug miduyog sa pagbangotan sa tibook katawhan sa dakbayan sa Cagayan de Oro tungod sa pagpanaw kagahapon ni Atty. Reuben R. Canoy.

Sa usa ka press statement, gibutyag ni Mayor Klarex nga dakong kawad-on sa nasud ang pagkamatay sa 93-anyos nga si Canoy, ang kanhi Mayor sa Cagayan de Oro niadtong 1972 hangtud 1976, Assemblyman sa Probinsya sa Misamis Oriental, ug tinahud nga lider sa pulo sa Mindanaw.

 

Dugang pa ni Mayor Klarex nga dili mapanas sa panumduman ang legasiya nga gibilin sa kanhi mayor ug magpabilin kini hangtud sa kahangturan, ilabina ang iyang pakigbisog aron maangkon ang demokrasya sa nasud.

Dugtong pa sa mayor nga bisan pa man sa mga katapusang gutlo sa iyang kinabuhi, naila, nabati ug nakahatag pa gihapon og inspirasyon sa mga Kagay-anon ang pagkatawo ni Atty. Canoy.

 

Pinaagi sa iyang nabantog nga programa sa radyo, kanunay niyang gibalik-balik ang kamahinungdanon sa pakiglambigit ug partisipasyon sa katawhan sa demokrasya, diin siya nag-ingon: “Ang lungsod nga nasayod maoy makahatag kusog sa demokrasya apan ang lungsod nga mapasagaron maoy makapukan sa atong kagawasan.”

“Sa imong pagtaliwan ngadto sa Labaw’ng Makagagahum, magsilbing inspirasyon kanamo kanunay ang imong hiyas sa kinabuhi ug mga binuhatan. Salamat sa imong kinabuhi,” panapos ni Mayor Klarex. (IAF/CIO)