MOBIYAHE ang 10 ka mga boksidor sa Cagayan de Oro City Amateur Boxing Team padulong sa Cebu City aron pagsalmot sa Palarong Pambansa Visayas-Mindanao Qualifying Tournament karong umaabot Hulyo 12 hangtud 17 ning tuig.

Kini ang gibutyag ni Team CDO Boxing Head Coach Elmer Pamisa, kauban si Tokyo Olympic Boxing silver medalist Carlo Paalam, City Sports Coordinator Jaymar Rivera ug assistant coaches Donie Mabao ug Francis Sinadjan, atol sa ilang pagkortesiya sa buhatan ni Mayor Klarex Uy kagahapong adlawa.

 

 

Ang lima ka mga boksidor nga moaway sa junior division (15 to 16 years old) mao sila si Nick Payla, Jerome Cometa, Sherwin Villanueva, Job Ezekiel Virtudazo ug Devon Tejano, samtang ang laing lima nga magpakitang-gilas sa youth division (17 to 18 years old) mao sila si Abraham Burlat, Aaron Burlat, Russel Sardallo, John Paul Napoles ug Crisaldy Beltran.

Sa iyang kabahin, mipadayag sa iyang tiunay nga suporta si Mayor Klarex ug naglaum kini nga magmalampuson ang Team CDO amateur boxing team sa ilang pagsalmot sa nahisgutang kompetisyon didto sa Cebu City. (IAF/photos by Aicy Soriano)