Sukwahi sa nangaging selebrasyon sa ika-17 ka tuig nga anibersaryo sa Cogon Market Day nga puno sa daghang kalihokan ug kalingawan, simpleng selebrasyon pinaagi sa usa ka Santos nga Misa ang gipahigayon sa Activity Center 2nd floor sa Cogon Market kagahapon Huwebes, Hulyo 7, 2022.

 

Ang kalihokan gipangunahan ni Majority Floor Leader City Councilor Ian Mark Nacaya kinsa mao usab ang Overseer sa City Economic Enterprises Department (CEED), uban sa mga empleyado, opisyales sa Cogon United Market Vendors Association (CUMVA) ug mga stakeholders.

 

Si CEED Dep’t Head Marfe Dacoco mipasabot nga kulang sa panahon ug budget ang mga stakeholders, ingon man ang ilang buhatan hinungdan nga ingon lamang niini ka simple ang ilang pag-selebrar sa ‘Cogon Market Day’.

“Bag-o pa usab nakabalik sa normal nga pagpamaligya ang mga stakeholders tungod sa pandemic mao nga apiki pa sa budget,” dugang ni Dacoco.

Sa susamang higayon, nagpa-blessing usab ang CEED sa ilang central office. Naglaum ang mga kadagkuan sa CEED nga sa sunod tuig mabalik na ang naandan nga mga dagkong kalihokan ug kalingawan. (ALR/CIO/Photos from CEED)