TUTOKAN ni Mayor Rolando ‘Klarex’ Uy ang pagsulbad sa problema sa basura sulod sa first 100 days sa iyang pamunoan sa dakbayan sa Cagayan de Oro.

‘Ang atong unahon mao ang pinakalisod buhaton kay ang tanan katawhan nagpaabot sa unang 100 days. Dili malikayan ang problema nga dili masolbad sa usa ka pamilok labina sa mga tawo nga nangandoy nga masulbad ang tanan problema, labina sa basura,” pamahayag ni Mayor Klarex bag-ohay lang.

 

Sa pakigtigom ni Mayor Klarex sa mga opisyal sa city hall ning bag-o, nasayran nga wala pay napirmahan nga kontrata tali sa syudad ug kompanya nga gitahasan pagkolekta sa basura.

‘Atong pangitaan og paagi nga masulbad ang problema sa basura sulod sa 100 days…ug ako nagalaum sa suporta sa konseho sa atong syudad,” panghinaut sa mayor.

 

Sa iyang inaugural speech, gibutyag ni Mayor Klarex nga iyang isugyot ngadto sa konseho ang ‘food-for-garbage’ exchange program aron madasig ang mga residente sa syudad nga aktibong molambigit sa garbage collection program.

‘Apan dili nako mahimo… makaya kon dili mopaluyo ang majority sa konseho sa dakbayan kay diha magsugod sa ila ang paghatag sa ako og gahum sa pag-implementar sa programa para sa atong dakbayan,’ panapos sa mayor. (IAF/CIO/photo by Aicy Soriano)