Agi’g tubag sa iyang saad nga pagbuhi sa ekonomiya, walay ipatuman nga bag-ong buluhisan o kaha pagsaka sa buhis dinhi sa Cagayan de Oro.

Kini ang gipasalig ni Mayor Rolando ‘Klarex’ Uy human mipagula ang iyang buhatan sa City Budget Memorandum No. 01-2022 kon giya sa matag departamento sa city hall alayon sa pagpangandam sa 2023 city annual budget.

 

Tungod kay walay bag-ong buluhisan, maningkamot ang syudad nga pakusgan ang pagpangolekta sa buhis pinaagi sa agresibong ‘tax information campaign’ kalabot sa paggamit sa ‘online payment system’, ‘ease-of-doing business’ ug paghatag sa ‘tax discounts’.

 

Sa iyang inaugural speech sa miaging bulan, gipadayag ni Mayor Klarex nga wala siya’y plano nga mopahamtang og bag-ong buhis, apan maghatag pa hinoon og diskwento sa mga negosyante nga mohimo og ‘advance tax payments’.

Subay sa maong budget memorandum, motanyag usab ang syudad og tax condonation sa interest ug penalties sa real property taxes kung mabayaran sa magbubuhis ang tanan niyang RPT taxes sulod sa tuig, apil ang mga delingkwente.

Apan kini nga lakang sa mayor nagkinahanglan pa og panugot sa City Council. (IAF/CIO)