Gipadayag ni Mayor Klarex Uy nga kinahanglan makiangayon ang pagtratar sa mga sidewalk vendors ug dili angayan tamakan ang ilang mga katungod sa pagpanginabuhi.

“Tarungon lang sila pag-istorya ug pagpasabot tungod kay sama kanato aduna usab sila’y mga damgo alang sa ilang pamilya,” pasabot ni Mayor Klarex atol sa paghinabi kaniya sa usa ka istasyon sa radyo kaganihang buntag.

 

Samtang, gihangyo usab sa mayor ang mga sidewalk vendors nga mosunod gayud sa balaod aron dili usab mapugos ang mga otoridad nga ipatuman ang unsa man nga silot nga ipahamtang.

Subling gisulti ni Mayor Klarex ang pagbalik sa ‘night café’ aron mahatagan og kahigayonan ang mga gagmay’ng negosyante nga makapamaligya.

Gani, gimandoan na niini ang buhatan sa City Assessor nga mangita og maayong luna nga mahimong ipahimutang ang ‘night café’ diin accessible kini sa katawhan ug dili makabalda sa dagan sa trapiko, ingon man adunay kaparkingan. (ALR/CIO)