Mokabat 56 ka mga benepisyaryo sa nagkadaiyang socialized housing projects sa syudad ang midawat sa ilang entry pass nga gipangulohan ni Mayor Rolando `Klarex’ Uy ug gipasiugdahan sa City Housing and Urban Development Department (CHDD) Lunes, Hulyo 25.

 

“Hinaut nga inyo kining gikahimuot ug gikalipay. Magpasalamat kamo sa gobyerno nga nagpakabana, nagtubag ug naghatag sa inyong gilauman nga puloy-anan,” mensahi ni Mayor Mayor Klarex ngadto sa mga benepisyaryo.

Gidasig usab sa mayor ang mga benepisyaryo nga dawaton sa hinay-hinay ang bag-o nilang lugar bisan kung distansiya na kini ug dili maghuna-huna nga gihikawan sa naandan nga kalihokan.

 

Nasayran nga kadaghanan sa mga benepisyaryo anaa na-relocate sa Pamalihi, Brgy. Pagatpat; Indahag Phase 2, Brgy Indahag; NHA Lumbia Heights, NHA Mambuaya Village Phase 1; ug uban pa nga relocation site sa syudad.

Giaghat sa mayor ang mga benepisyaryo nga suportahan ang gobiyerno kay magpadayon ang maong programa aron daghan pa nga mga banay ug pamilya ang mahatagan sa kahigayonan nga makabaton og kasigurohan ug dignidad nga pagpuyo pinaagi sa desenteng pinuy-anan.

 

 

 

Kauban ni Mayor Klarex sila si City Councilor Edgar Cabanlas, Ms. Lalaine N. Omaña, CHUDD Acting Asst. Dep’t Head, ug Atty. Joeffrey D. Namalata, CHUDD Overseer, ingon man mga personahi sa maong buhatan. (ALR/CIO/Photos by Jay Arancon/CIO & Aicy Soriano/CMO)