GIPADAYAG ni Cagayan de Oro City Mayor Rolando ‘Klarex Uy’ ang iyang hugot nga suporta sa pagpadayon sa proyekto kabahin sa ‘adolescent and youth sexual and reproductive health program’ sa tuyo nga matuki ug mahataga’g sulbad ang suliran sa teenage pregnancy ug uban pang isyu sa mga kabatan-onan karon.

 

 

Kini ang giluwatang pamahayag ni Mayor ‘Klarex’ atol sa gipahigayong courtesy visit sa mga kadagkuan sa ‘The Challenge Initiative’, Zuellig Family Foundation, Population Commission Region 10, City Health Office, Department of Health, Community Improvement Division ug mga miyembro sa city leadership team kagahapon, Agosto 2.

 

Gisiguro ni Mayor Klarex nga andam siyang molagda sa memorandum of understanding tali sa mga nahisgutang ahensya alang sa maong katuyoan ug andam usab kini mopaubos sa ‘Leadership for Adolescent Youth-Friendly Cities’ training alang sa mga mayor.

 

Nagtuo si Mayor Klarex nga kinahanglan mapadayon ang maayong mga programa kung kini mapuslan sa katawhan.

Gani, andam kini mogahin og pondo alang sa programa ngadto sa CID aron mapalapdan ang kasamtangan 10 ka pilot barangays sa syudad nga nag-implementar sa programa.

 

Tungod niini, malipayon si POPCOM-X regional director Engr. Neil Adlrin G. Omega, Zuellig Family Foundation Executive Director Mr. Austere Panadero, Chief of Party for TCI Dr. Dorie Balanoba, Miss Pearl Catingub sa TCI, City Health Officer Dr. Rachel D. Dilla kinsa co-chair usab sa Information and Service Delivery Network for Adolescent Health and Development, ug tanang miyembro sa city leadership team sa adbokasiya ni Mayor Klarex alang sa mga kabatan-onan. (AGP/Photos Jay Arancon/CIO)