Ang kahusay ug kalinaw mahinungdanon sa usa ka lugar aron makab-ot sa mga molupyo ang malinawon ug hapsay nga pagpamuyo sa komunidad.

Kini ang pamahayag ni City Mayor Rolando ‘Klarex’ Uy atol sa groundbreaking ceremony kagahapong adlawa sa Police Station 1 Divisoria diin tukoron kini diha sa kanhi Post Office sa may dalan Chavez ning syudad.

 

Ang kalihukan gitambongan mismo ni Interior and Local Government Secretary Benjamin Abalos Jr.; DILG 10 regional director Arnel Agabe, Cagayan de Oro City Police Director Col. Aaron Mandia ug uban pa.

Sa iyang hamubong mensahe, gibutyag sa mayor nga prayoridad sa iyang administrasyon ang pagpalig-on sa seguridad ug pagpatunhay sa kahusay ug kalinaw.

 

Gani, kini ang nag-unang rason kon nganong sa sentro gayud sa Divisoria ipahimutang ang Police Station 1 aron mas sayon makit-an ug duol adtoan sa mga katawhan nga nanginahanglan sa serbisyo sa kapolisan.

Hinoon, aminado si Mayor klarex nga dili kini mahimo kung wala ang tabang ug kooperasyon sa katawhan sa dakbayan, ilabina gayud ang hugot nga suporta sa kapolisan ug nasudnong kagamhanan. (AMTB/ Photo by Rod Constantino/CIO)