GIPAHIBALO ang publiko nga abli ugmang adlawa, Biyernes, Agosto 5, sugod alas-10:00 sa buntag hangtod ala-5:00 sa hapon ang SM Downtown (widescreen cinema) isip dugang mega vaccination site sa syudad.

Kini gawas pa sa Limketkai mall nga motanyag sa pagpamakuna sa 5-11 anyos, 12-17 anyos ug 18 anyos pataas alang sa primary vaccine series, first ug second booster doses.

 

Padayong abli ang SM Downtown karong Agosto 6, alang sa mga katawhan nga buot magpabakuna sa adlaw’ng Sabado gamit ang bakunang Astrazeneca, Pfizer, Moderna ug Sinovac.

 

Subling giaghat ni City Health Officer Dr. Rachel D. Dilla ang katawhan nga kompletuhon ang bakuna batok COVID aron sa ingon makasukol ang lawas kon ugaling mataptan sa virus ug nagpahimangno usab kini sa husto ug kanunay pagsul-ob sa facemask, ug pagtuman sa uban pang health protocols nga gipatuman sa gobyerno.

 

Padayong giawhag ang 12 anyos pataas nga mahimo nang magpatupok sa first booster doses, samtang ang mga healthcare workers ug pamilya niini, senior citizens, 18-49 anyos nga adunay gihambin nga sakit o ‘comorbidities’, ug 50 anyos pataas eligible na alang sa second booster doses. (AGP-CIO/CIO FILE PHOTO)