Tungod sa ubay-ubay nga mga reklamo nga nadawat sa ilang buhatan kalabot sa sitwasyon sa traffic ug mga sidewalk vendors sa Cogon Market, nagtigom ang mga kadagkuan sa Roads and Traffic Administration (RTA) pinangulohan nila ni Administration Head Engr. Nonito Oclarit ug Traffic Enforcement Acting Officer-in-Charge Dennis Naive uban sa mga traffic enforcers aron matubag kini nga mga butang.

 

Gipasabot ni Engr. Oclarit ngadto sa mga traffic enforcers nga kinahanglan iplastar ang pagdumala sa traffic palibot sa Cogon market area aron dili maghuot ang dagan sa trapiko.

Ipahimutang usab ang team sa Roads and Sidewalk Clearing Unit (RaSCU), ug ang Bicycle Enforcement & Events Patrol (BEEP) uban ang mga personahi nga nadestino sa Cogon area aron motabang nga mapahapsay ug mapugngan ang paghuot sa trapiko.

 

Dumduman nga samtang gipadayag ni Mayor Rolando `Klarex’ Uy nga hatagan niya og higayon nga makapanginabuhi ang mga sidewalk vendors apan kinahanglan mosunod usab sila sa balaod.

Alayon niini, gihangyo sa RTA ang igong pagsabot, tabang ug kooperasyon sa publiko kalabot niini ilabina karong panahona sa ‘new normal’ diin magdasok na usab ang katawhan ug mga sakyanan gikan sa silingang lugar ug dugangan pa usab sa nagpadayon nga nagkadaiyang drainage ug construction projects. (ALR/CIO/Photos by Reynan Baylin)