Pormal nga gitunol sa mga kadagkuan sa A Brown Company Inc. ngadto sa syudad ang Deed of Donation sa 780 metros kuadrados nga lote nga nahimutang sa Uptown, Brgy. Carmen atol sa flag raising ceremony, Lunes, Agosto 15, 2022.

Ang ceremonial turnover gipangulohan ni ABCI Executive Chairman Robert Pizarro, kanhi Bise Mayor Atty. Antonio Soriano, ug mga kauban, diin gidawat kini ni City Administrator Atty. Roy Hilario Raagas isip representante ni Mayor Rolando `Klarex’ Uy, uban sa mga miyembro sa 20th City Council.

 

Una nang gipadayag ni Mayor Klarex sa milabay’ng mga semana ang mahitungod sa luna nga idonar sa A Brown diin gipaabot lang niya ang opisyal nga paghatag niini.

Matud ni Mayor Klarex nga ang maong luna maoy tukuran sa dugang police station, fire station, ug service station usab sa City Disaster Risk Reduction and Management Department (CDRRMD).

Samtang, gipasabot ni Atty. Raagas nga ang Deed of Donation gikatakdang iduso ni Mayor Klarex ngadto sa City Council aron mahatagan siya og panugot nga mopirma sa pormal nga pagdawat sa maong donasyon. (ALR/CIO/Photos by Roel Felicitas/CIO)