SUBLING nagpahinumdum si Mayor Rolando ‘Klarex’ Uy kung unsa kamahinungdanon ang pagpabakuna sa first ug second dose sa COVID-19 vaccines ug booster doses isip panagang kon ugaling mataptan sa virus.

 

“Kung gimahal nimo imong kaugalingon, magpabakuna ka, magpa-booster. Kay paghatag mana og panalipod sa imong kaugalingon”, saysay pa ni Mayor ‘Klarex’.

Giluwatan sa mayor ang pahinumdom sa publiko ilabina nga daghan ang nakahan-ay nga ‘face-to-face’ fiesta activities alayon sa ‘Higalaay Festival 2022’.

 

Mensahe usab ni City Health Officer Dr. Rachel Daba-Dilla sa mga wala pa nagpabakuna nga dili na maglangan ug moadto na sa pinakaduol nga mga vaccination sites nga gidumala sa syudad.

Sigon ni Dr. Dilla nga ang mga dili bakunado, maoy mga ‘vulnerable’ nga mataptan sa COVID, ug taas ang tsansa nga dili lang mild o asymptomatic ang masinati.

 

Ugmang adlawa, Agosto 18, adunay pagpamakuna alang sa 5 anyos pataas diha Limketkai mall, City Health Office, house-to-house vaccination sa barangay Camaman-an ug Lumbia, ug ‘stall-to-stall’ vaccination sa Cogon Market.

Samtang sa 12 anyos pataas, abli usab ang barangay health centers sa Agusan; Bulua; Balulang; Camaman-an; Cugman; Dansolihon; Macanhan, Carmen; Sto Niño, Lapasan; ug Tignapoloan. (AGP/infographics by Rod Constantino/CIO)