GIBUKSAN na ang out-patient department (OPD) sa Cagayan de Oro Lumbia Hospital sugod karo’ng adlawa, Septiyembre 6 alang niadtong buot magpahimulos sa libre’ng konsulta sa maong hospital.

 

 

Matud ni Dr. Liova de Guia, chief of hospital sa Lumbia, nga andam na ang maong hospital alang sa maong katuyoan ug sila mismo ang moabag sa referral sa laing hospital bisan pa man og dili pa kini fully operational.

 

Matud ni Dr. de Guia malaumon sila nga mahatag ang ubang serbisyo sa Lumbia hospital sa dili pa matapos ang tuig 2022, diin lakip sa ilang serbisyo ang emergency room assistance, laboratory ug mga primary cases nga haom sa infirmary status niini.

 

 

Samtang, mismo si Mayor Rolando “Klarex” Uy ang migahin og panahon sa pagtambong sa maong kalihukan ug nagpadayag sa iyang dakong suporta sa panglawas, kauban sila Konsehal Maria Lourdes Gaane ug Imee Moreno, Philhealth nga gipangulohan ni Mr. Delio Aseron II, mga department managers, Lumbia barangay officials pinangulohan ni Punong Barangay Alexander Torralba ug mga kadagkoan sa City Health Office sa pagpangulo ni City Health Officer Dr. Rachel Dilla.

 

Ang pagpabarog sa 25-bed, 3-storey building Lumbia hospital gipundohan sa kagamhanang lokal sa panahon ni kanhi Mayor Oscar Moreno, inubanan sa dakong suporta ni kanhi Kongresman ug karon City Mayor Klarex Uy sa tinguha nga maserbisyohan ang mga residente sa southwestern part ning syudad ug makatabang nga makunhoran ang mga pasyente sa JR Borja General Hospital. (ACM/Photos by ROEL FELICITAS and ROD CONSTANTINO/CIO)