GIHINGUSGAN ni Dr. Teodulfo Joselito Retuya Jr, city epidemiologist sa City Health Office, nga mas menus ang simtomas nga bation sa usa ka tawo kung mataptan sa sakit nga COVID-19 kung kini bakunado o nakadawat sa primary COVID-19 vaccines ug booster shots.

 

Sigon sa datos ni Dr. Retuya, sukad September 5 hangtod 11 ning tuig, moabot sa 57 ang natala nga natakboyan sa COVID-19 dinhi sa syudad.

 

 

Sa maong ihap, 20 ang ‘asymptomatic’ o walay gibati nga simtomas, 28 ang nakasinati og ‘mild symptoms’, 8 ang adunay ‘moderate symptoms’ ug 1 ang nag-antos sa ‘severe symptoms’ nga usa ka senior citizen.

Busa padayong nanawagan si Dr. Retuya ilabina sa mga senior citizens nga kompletuhon ang bakuna batok COVID-19 ug magpa-booster, ilabina nga mas hinay ang ilang resistensya gumikan sa edad ug aduna nay gihambin nga laing mga sakit o ‘comorbidity’.

 

Alang sa atong schedule sa pagpamakuna karong September 13, adunay pagpamakuna alas 9:00 sa buntag hangtod alas 4:00 sa hapon diha sa Limketkai mall, City Health Office, ‘stall-to-stall’ sa Carmen market, Barangay Hall sa Brgy. 29, ug ‘house-to-house’ vaccination sa Brgy. Macabalan.

 

Aduna usab pagpamakuna sugod September 12-16 sa mga health centers sa Barangay Bayabas, Balulang, Bonbon, Bulua, Canitoan, Carmen, Iponan, Kauswagan Main, Kauswagan NHA, Lumbia, Macanhan, Mambuaya, Patag, Pagatpat, Agusan, Bugo, Camaman-an, Cugman, Gusa, Indahag, Lapasan main, Macasandig, Nazareth, Macabalan/Puntod, Tablon ug Puerto.

 

Samtang karong Huwebes, September 15, adunay pagpamakuna diha sa barangay Tagpangi atol sa ikatulong hugna sa ‘Klarex nga Serbisyo sa Baryo’ sa pagpangulo ni Mayor Klarex Uy.

Sa laing bahin, nagpahimangno ang Regulatory Compliance Board sa tanang mga lisensyadong bulangan sa syudad nga motuman sa Executive Order No. 038-2022, diin nalatid ang gabayan nga ‘NO COVID-19 Booster, No Entry’ policy. (AGP/Photos by Rod Constantino and Reynan Baylin/CIO)