KASAMTANGANG gipahigayon sa Department of Social Welfare and Development 10 ang 3rd Quarter Social Pension Payout diha sa kabarangayan alang sa mga senior citizens.
Gisugdan ang maong payout niadtong Septiyembre 13 ug matapos karong Septiyembre 17, diin ubay-ubay ka mga barangay ang giadtoan sa City Social Welfare and Development Office aron ipahigayon ang quarterly payout.
Sa distrito uno, ang payout gihimo diha sa Brgy. Lumbia, Tumpagon, Pigsag-an, Tuburan, Taglimao, Pagalungan, Besigan, Tignapoloan, Tagpangi, Dansolihon, Bayanga, Mambuaya, San Simon, Baikingon, Pagatpat, Balulang, ug Balubal.
Samtang sa distrito dos, anaa ang payout team diha sa Brgy. Lapasan, Puerto, Consolacion, Puntod, FS Catanico, Cugman, Gusa, Tablon, Agusan, Macasandig, ug Bugo.
Gipahinunduman ang mga benepisyaryo nga magdala sa original ug photocopy sa OSCA ID.
Gihangyo usab ang mga authorized representatives nga magdala sa original ug photocopy sa OSCA ID sa benepisyaryo, authorization letter nga gipirmahan sa benepisyaryo, original ug photocopy sa ID sa representative ug medical certificate sa benepisyaryo nga adunay PRC license number.
Mipahimangno usab ang mga otoridad nga magdala sa kaugalingong ballpen ug vaccination card ang matag indibidwal nga mosalmot sa payout, mosubay sa minimum public health standards ug mosunod sa gitakda nga schedule. (SPPalen/CIO| Infographic by OSCA)