GIPANGUNAHAN ni City Mayor Rolando "Klarex" Uy ang pagpanumpa sa mga opisyales sa Federation of United Fisherfolk Association in Cagayan De Oro City atol sa pagpakayab sa nasudnong bandila sa Barangay Tablon adlaw’ng Martes, Oktubre 4, 2022.

 

Ang maong grupo gilangkuban sa 23 ka asosasyon sa mga mangingisda gikan sa lain-laing barangay sa dakbayan nga gipangulohan ni Mr. Lary Sabella, ang Chairman sa FEDCOBAFAC.

 

Tumong sa maong grupo nga magkahiusa ang mga fisherfolks sa tibuok dakbayan ug mahimong instrumento aron mas mahatagan sa igong pagtagad ang panginahanglan sa mga mangingisda sa dakbayan.

 

Gani human sa maong pagpanumpa, adunay gihimo nga open forum ang maong grupo ug si Mayor Klarex, diin mipaabot ang maong grupo sa ilang pasalamat ngadto sa mayor tungod sa iyang suporta sa sektor sa mga mangingisda.

 

Sa iyang kabahin, misaad usab si Mayor Klarex nga mamahimong dakong kabahin ang maong asosasyon aron mapaabot kaniya ang unsa man nga tabang ang gikinahanglan sa grupo ug usab mas mapadali ang pagtunol sa tabang sa gobyerno ngadto sa mga fisherfolks.

 

Nasayran nga adunay 12 ka coastal barangays ang Cagayan de Oro ug kini gilangkuban sa barangay Bulua, Bayabas, Bonbon, Macabalan, Puntod, Lapasan, Gusa, Cugman, Bugo, Tablon, Agusan ug Puerto. (AMTB/photos by Jay Arancon of CIO)