NADUGANGAN ang kapasidad sa emergency room sa JR Borja General Hospital (JRBGH) gikan sa 11 ngadto na sa 28 ka ER beds aron mas daghan pa ang mahatagan og serbisyo niini.

 

Matud ni Dr. Michael Jun Perez, officer-in-charge sa JRBGH, nga daghang kausaban karon sa maong hospital ug gihangyo niini ang pagsabot sa katawhan kung ugaling adunay kabalda nga ilang masinati panahon nga moanha sa city hospital.

 

Dugang ni Perez nga sugdan na usab sa dili madugay ang katukoran sa Green Zone Parking, ingon man ang luag ug hamugaway nga out-patient department (OPD) waiting area uban sa paningkamot ni JRBGH overseer Dr. Ferdinand Miranda aron mahatagan sa dakong kasayon ang katawhan.

 

Ang JRBGH kasamtangang anaa pa sa Level I accreditation apan modawat na sa Level II services samtang naghulat na lamang sa accreditation gikan sa Department of Health (DOH).

 

Kahinumdoman nga bag-o lang usab gibuksan sa JRBGH ang Hemodialysis unit, CT Scan ug RT-PCR Molecular Laboratory sa pagpangulo ni Mayor Rolando “Klarex” Uy alang sa mas epektibo ug malangkubong serbisyo sa nasangpit nga balay-tambalanan. (ACM/Photos by ROD CONSTANTINO/CIO)