Aprobado na ni Mayor Rolando `Klarex’ Uy ang Quick Response Team-Special Operation Group (QRT-SOG) nga gimugna sa Roads and Traffic Administration (RTA), lakip mga tahas niini.

 

Gipasabot ni RTA head Engr. Nonito Oclarit nga tumong sa pagmugna sa maong special unit nga diretsong marespondehan ang nagkadaiyang problema sa trapiko ug mga kalapasan.

 

Ang mga tahas sa QRT-SOG mao ang mga mosunod: magpahigayon og traffic monitoring ug modakop sa mga malapason; paspas nga aksyon kung adunay grabe ang trapik tungod sa traffic accidents, nag-convoy sa VIPs, sunog, baha ug mga susamang hitabo.

 

Modakop sa mga malapason nga naka-babag sa trapiko; illegal parking ug uban pa nga kalapasan sa trapiko; mo-backup sa bisan unsa nga special operations sama sa pagbadlong sa mga illegal vendors palibot sa kamerkadohan; magpahigayon og operations nunot sa DILG MC No, 2020-026 kalabot sa Tricabs, pedicabs, ug tricycle nga nag-operate sa national highways.

 

Magsilbi usab nga escort unit atol sa requested motorcade, caravan, ug VIP guests; magpahigayon og joint operations uban sa mga law enforcement agencies sama sa LTO, PNP-HPG, PNP-COCPO, PNP Traffic Division COCPO kung gi-request.

 

Ingon man pagbuhat sa uban nga may kalambigitan sa mga gimbuhaton kung gikinahanglan ug gimando sa kadagkuan.

 

Malaumon si Engr. Oclarit nga pinaagi niini mahatagan og kasulbaran ang problema sa trapiko sa nagkadaiyang kadalanan ning syudad.

Nunot niini, mapasalamaton si Engr. Oclarit kang Mayor Klarex nga gisuportahan ug giuyonan ang rekomendasyon sa RTA. (ALR/CIO/Photos from RTA)