SA tinguha nga mas mahatagan ug mapaduol ang serbisyo sa gobyerno sa katawhan, gimando ni Mayor Rolando “Klarex” Uy ang paspas nga pagtibawas sa Cagayan de Oro-Tablon Hospital alang sa kasayon sa mga molupyo sa esteng bahin ning syudad.

 

Sa pakigtagbo ni Mayor Klarex sa konseho sa Brgy Tablon sa pagpangulo ni Punong Brgy Billy Kid Auza, iyang gipadayag ang iyang tinguha nga matibawas ug mapuslan na sa katawhan ang Cagayan de Oro-Tablon Hospital sunod tuig.

 

Matud sa mayor andam ang iyang administrasyon sa paghatag og dugang pundo alang sa maong hospital, lakip mga ekipo nga gikinahanglan sa pagpadagan niini.

 

Ang Tablon Hospital maoy ikatulong hospital nga gitukod ubos sa lokal nga kagamhanan ning syudad.

 

Samtang, hugot usab ang suporta sa konseho sa Brgy Tablon sa mga tinguha ug proyekto ni Mayor Klarex sa kabarangayan ug ilang gipasalamatan ug gikalipay ang paghatag sa mayor og pagsalig kanila.

 

Kahinumdoman nga una nang gibuksan ang Cagayan de Oro–Lumbia Hospital niadtong Hunyo ning tuig alang sa mga molupyo sa south western portion ug hinterland barangays ning syudad. (ACM/Photos by JAY ARANCON/CIO)