PORMAL nang gibuksan ang X-Ray laboratory sa City Health Office (CHO) sa pagpangulo ni Mayor Rolando “Klarex” Uy karong adlawa, Oktubre 7, 2022 ug mapahimuslan na kini sa katawhan sa mas ubos nga balayronon.

 

 

Sa mensahe ni CHO consultant Dr Fe Bongcas, iyang gibutyag nga lakip sa barato’ng serbisyo ang ubang laboratory exams nga naglakip sa Blood Chemistry, CBC ug daghan pa sanglit anaa na sa Level II accreditation ang laboratory niini.

 

Dugang pa niini, mapasigarbohon usab ang mga empleyado ug personahe sa CHO sa pagpangulo ni City Health Officer Dr Rachel Dilla nga mahatagan og dekalidad nga serbisyo ang katawhan sa tinguha usab nga makunhoran ang mga pasyente sa JR Borja General Hospital.

 

Lakip usab nga gilusad ni Mayor Klarex ang Philhealth Konsulta Package sa CHO ubos sa unang tuig sa implementasyon sa Universal Health Care Law (UHC) diin usa ang Cagayan de Oro sa napiling pilot city nga ipatuman ang UHC.

Sa iyang mensahe, gipasalamatan usab ni Mayor Klarex ang mga personahe ug mga medical doctors sa CHO sa ilang makanunayong serbisyo ug gidasig kini niya sa padayonong pag-alagad ug pag-abag sa iyang mga programa sa panlawas.

 

Kahinumdoman nga usa ang serbisyong panlawas sa mga priority programs sa administrayon ni Mayor Klarex. (ACM/Photos by ROD CONSTANTINO/CIO)