MOKABAT na sa 5,548 ang kinatibuk-ang gitunol nga Philhealth identification cards ug member data record sa mga NHTS members gikan sa National Health Insurance Corporation (Philhealth X) sa unom ka hugna sa ‘Klarex nga Serbisyo sa Baryo’ community outreach program ni Mayor Rolando ‘Klarex’ Uy.

 

Atol sa KSB sa Indahag, Oktubre 6 ning tuig, nagpasalamat si Mayor ‘Klarex’ sa Philhealth X sa makunanayong suporta sa ahensya alang sa kasigurohan sa panglawas sa katawhan.

 

Mapasalamaton ang mayor sa pagduyog sa ahensya sa first 100 days niini nga paglingkod pinaagi sa pag-apod-apod og mga IDs ug MDRs, ingon man paghatag serbisyo atol sa ‘Klarex nga Serbisyo sa Baryo’, kauban ang City Health Insurance Office sa Tignapoloan, Balubal, Tagpangi, Taglimao, Puntod ug Indahag.

 

Sa Indahag, personal nga gitunol sa mga kadagkuan sa Philhealth Region 10 pinaagi ni Ms. Maria Rhodella S. Monsanto, Field Operations Division chief;

 

Mr. Marlon Niño S. Arrabaca, Local Health Insurance Office Cagayan de Oro chief; ug Mr. Abdul Obedi S. Alip, Social Insurance Officer III ang 1,238 ka mga ID ug MDRs ngadto ni Mayor Klarex ug ni Kapitan Jocelyn Dahino ug barangay council. (AGP/Photo by Rod Constantino/CIO)