SA tinguha nga mas mapaabot ug mapaduol ang serbisyo sa gobyerno sa katawhan, gisaad ni Mayor Rolando “Klarex” Uy ang pagbaton og mobile clinic sa unang quarter sunod tuig.

 

Matud ni Mayor Klarex, tinguha sa iyang administrasyon nga maserbisyohan ang katawhan ilabina sa kabukiran sa serbisyong-medical, sanglit usa sa iyang mga nag-unang prayoridad ang panglawas.

Lakip sa mga serbisyo sa mobile clinic ang X-ray ug ubang laboratories agi’g pagsanong sa implementasyon sa Universal Health Care Law.

 

Dugang sa mayor, laumang tukoron usab sa Brgy Carmen ang labing unang mega health center aron makunhoran ug matabangan ang JR Borja General Hospital (JRBGH) nga karon anaa na sa kapin 200 capacity ang gialagaran bisan pa man og anaa lamang kini sa 100-bed capacity.

 

Matud ni Mayor Klarex, mahinungdanon kaniya ang serbisyong panglawas ug edukasyon aron makabaton og himsog ug malambuong syudad ug komunidad. (ACM/Photo by ROD CONSTANTINO/CIO)