Malipayon ug mapasalamaton ang 43 ka former rebels (FRs) ngadto gobyerno partikular na kang Mayor Rolando `Klarex’ Uy ug sa National Housing Authority (NHA) human nahatag kanila ang ilang balay nga maoy usa sa mga prebilihiyo ug benepisyo nga gisaad kanila atol sa ilang pag-surrender ug subling pagsalig sa gobyerno ubos sa Enhanced Comprehensive Local Integration Program (ECLIP) sa syudad.

 

Sa iyang mensahi, gidayeg ug gipasalamatan ni Mayor Klarex ang 43 ka FRs tungod sa ilang pagbalik sa sabakan sa gobyerno aron magpuyo nga malinawon uban sa ilang mga pamilya.

 

 

Alayon niini, gihangyo sa mayor ang mga benepisyaryo nga ampingan ang balay nga gihatag kanila sa NHA partikular na sa gobyerno ilabina nga talagsaon kini nga kahigayonan nga gihatag kanila.

 

Gipasalamatan usab ni Mayor Klarex ang NHA, City Social Welfare & Development Department (CSWD), Department of Social Welfare & Development (DSWD), Armed Forces of the Philippines Philippine Army (AFP-PA), Philippine National Police (PNP) ug tanang stakeholders nga mitabang ug misuporta aron magmalampuson ang ECLIP aron maatiman ang mga rebel returnees.

 

Lakip nga gipahigayon ang signing sa Deed of Donation ug Financing Agreement diin gipadayag sa kadagkuan sa NHA nga diretso nang mapuy-an sa mga benepisyaryo ang ilang mga balay human sa ilang pagpirma.

Atol sa ilang pagbalhin sa bag-o nilang pinuy-anan, gipabalonan usab og usa ka sako nga bugas, usa ka karton nga canned goods, ug usa ka karton nga noodles ang matag usa kanila, matud ni Norhidaya Hadji Sarip, head sa ECLIP Secion sa CSWD. (ALR/CIO/Photos by Rod Constantino/CIO)