GIPADAYAG ni Mayor Rolando ‘Klarex’ Uy ang kamahinungdanon sa paghatag og gahom sa mga barangay o ‘barangay empowerment’ aron mas epektibo ang pagtunol sa serbisyo ngadto sa katawhan sa dakbayan.

 

Kini ang giluwatang pamahayag ni Mayor Klarex atol sa iyang pagsalmot sa pagpakayab sa nasudnong bandila sa Barangay Baikingon sa pagpangulo ni Kapitan Nathan P. Yañez, Oktubre 11.

 

Ang Baikingon ang ikaunom nga barangay nga giadtoan sa mayor human sa Camaman-an, Macasandig, Tablon, Mambuaya ug Pagalungan sa tuyo nga masud-ong ang sitwasyon sa matag barangay.

 

 

Ubos sa liderato ni Mayor ‘Klarex’, dako ang pagsalig niini sa mga barangay kapitan kinsa maoy nakahibalo sa haom nga proyekto nga gikinahanglan sa ilang barangay.

 

Dumduman nga migahin si Mayor ‘Klarex’ og balor P10 milyones pesos nga balor sa mga proyekto pinasubay sa ‘program of works’ nga giduso sa barangay sa Baikingon.

 

 

Mapasalamaton usab si Kapitan Yañez sa suporta sa mayor ingon man sa 500 ka mga ‘food packs’ nga dala sa kagamhanang lokal pinaagi sa City Social Welfare & Development alang sa mga ‘target beneficiaries’.

 

Gihangyo usab ni Mayor ‘Klarex’ ang suporta ug kooperasyon sa katawhan sa Baikingon alang sa kalamposan sa programa sa kagamhanan, ug nagpasalig usab kini nga kanunay siya andam maminaw sa mga mulo sa katawhan.