SA tinguha nga mahatagan sa tubag ug kasulbaran ang problema sa basura ning syudad, gimugna ni Mayor Rolando “Klarex” Uy ang technical working group (TWG) nga motutok alang sa kasulbaran niini.

 

Sa 100 Days Report ni Mayor Klarex kagahapong adlawa, Oktubre 10, iyang gibutyag nga unom ka barangay na ang mas napalambo ug napalig-on ang solid waste management program ug adunay dugang garbage trucks usab nga motubag sa pagsulbad sa basura.

 

Matud ni Mayor Klarex ang pagtuon sa TWG ug pakiglambigit sa kabarangayan naghatag og dugang kapasidad sa barangay sa pagtuman sa ilang tahas subay sa RA 9003 ug ang kooperasyon sa komunidad nga maoy tubag ug solusyon sa problema sa basura.

 

Gipasalamatan usab ni Mayor Klarex ang City Local Environment and Natural Resources Office (Clenro) ubos sa pagpangulo ni Engr. Armen Cuenca sa paningkamot niini pagpatuman sa City Ordinance 13378-2018 o mas nailang “Integrated Ecological Solid Waste Management Ordinance.”

 

Samtang, gidasig ni Mayor Klarex ang katawhan sa pagsuporta sa ‘desilting activity’ sa Iponan ug Cagayan de Oro river nga nakatabang sa reclamation area sa coastal road nga anaa na sa 1,000 hectare ang nahimo.

 

“Ang epekto sa paghuman niini’ng coastal road sa este nga bahin sa syudad, nag-abri ug oportunidad sa pag-reclaim ug gamit sa dili mo-ubos sa 1,000 ka hektarya sa atong coastline nga mamahimong dugang nga real estate asset sa syudad, nga maoy kabutangan sa uban nga kalambu-an sa industrya ug komersyo, kahinguhaan sa dugang nga buhisan, ug tinubdan sa daghan nga trabaho,” pasabot sa mayor.

 

“Dili masayang ang mga materyales nga makuha sa ato’ng giplano nga mga desilting activities sa Iponan ug Cagayan de Oro River, kay mabutang man nato kini sa mao’ng mga lugar. Kini nga reclamation usa ka nakita nga epekto sa pagtukod nianang Coastal Road ug sa ato’ng giplano nga desilting projects” dugang pa sa mayor. (ACM/Photo by ROD CONSTANTINO-CIO)