World Health Organization
Department of Health 
NUNOT sa panawagan nga magbaton og kaugalingong 'testing laboratory' ang rehiyon, plano karon sa Department of Health X nga i-convert ang TB (tuberculosis) Reference center nga nahimutang sa DOH compound ning syudad alang sa coronavirus disease COVID-19 testing.
Kini ang gikompirma ni Dr. Adriano Subaan, regional director sa DOH X, atol sa press conference nga gipahigayon sa Regional Inter-agency Task Force for the Management of Emerging Infectious Disease kon RIATF-EID, Marso 27 ning tuig.
Kahinumdoman, una nang nagpadangat og sulat hangyo si Mayor Oscar S. Moreno kang Health Secretary Francisco Duque III nga mahatagan og 'testing capacity' ang rehiyon.
Apan giklaro ni Dr. Subaan nga ang testing laboratory alang sa COVID-19 dili ordinaryo tungod kay kinahanglan nga medical technologist ug ubang pang medical experts ang moatiman o mo-facilitate sa testing gumikan sa component niini nga 'biohazard' nga peligro sa panlawas sa tao.
"We have already signified our intention to convert our TB reference center inside the DOH compound. Our TB reference center has an RT-PCR (real time polymerase chain reaction) equipment that can actually be used for the testing except that naay other requirements", pagpasabot ni Dr. Subaan.
Giklaro usab ni Dr. Subaan nga kini plano pa lamang ug tun-an pa sa national testing laboratory sa COVID-19 nga mao ang Research Institute for Tropical Medicine kung nakasubay kini sa standard, gawas pa nga duna pay laing requirements gawas sa RT-PCR equipment.
