GILARAW sa kadagkoan sa City Health Office (CHO) ubos sa administrasyon ni Mayor Rolando “Klarex” Uy ang pagpailawom sa buhatan sa major renovation sa tinguha nga mahatagan og kahamugaway ang pagserbisyo sa katawhan ug mahisama kini sa JR Borja General Hospital (JRBGH).

 

Matud ni CHO Consultant Dr Fe Bongcas nga sugdan sa dili madugay ang major renovation niini aron makatabang kini sa pagpakunhod sa gidaghanon sa mga pasyente nga modangop karon sa JRBGH, sanglit nakabaton na karon og state-of-the-art laboratories ug X-ray ang City Health Office.

 

Bag-ohay lamang gilusad usab ang Konsulta Package sa Philhealth sa CHO aron makadawat og libreng konsultasyon ang katawhan nga modangop sa ilang buhatan.

 

Dako usab ang kalipay ug pasalamat ni City Health Officer Dr. Rachel Dilla sa teamwork tali JRBGH, City Health Insurance Office ug CHO aron mas mapasayon ug paspas ang paghatag sa serbisyo sa katawhan sa Cagayan de Oro, ilabina may kalabotan sa panglawas.

 

Kahinumdoman nga usa sa mga nag-unang priority agenda ni Mayor Klarex ang panglawas sanglit nagtuo ang mayor nga paspas ang kalamboan sa syudad kung himsog ang mga molupyo niini. (ACM/Photos by ROD CONSTANTINO/CIO)