ALAYON sa paghandum sa Adlaw sa mga Santos ug mga Kalag karong umaabot Nobyembre 1 ug 2, giaghat sa lokal nga kagamhanan pinaagi sa City Health Office ang pagsuot sa face masks ug pagsunod sa minimum public health standards sa pagsulod sa mga pribado ug pampublikong sementeryo.

 

Sa gipahigayong coordination meeting tali sa mga tigdumala sa private ug public cemetery, kapulisan, barangay ug local government, gipasabot ni Dr. Jan Sherwin Samong sa City Health Office ang kamahinungdanon sa pagsul-ob sa face masks sanglit anaa pa ang COVID 19 virus sa palibot ug malikayan ang posibleng pagkaylap niini diha sa pagbisita sa mga sementeryo.

 

Matud ni Dr. Samong bisan pa man og anaa nay kamandoan sa boluntaryong pagsul-ob sa face masks, apan laumang modagsa ang katawhan sa mga sementeryo human sa duha ka tuig nga pagdili sa mga mobisita niini tungod sa pandemya.

 

 

Dugang pa ni Dr. Samong laumang magpagula usab og gabayan si Mayor Rolando “Klarex” Uy basi usab sa rekomendasyon gikan sa health cluster sa Local IATF.

Samtang gipasalig usab sa mga tigdumala sa pribado ug pampublikong sementeryo ning syudad nga andam na sila pagdawat sa mga mobisita sa ilang mga mipanaw nga minahal sa kinabuhi. (ACM/Photos by ROD CONSTANTINO/CIO)