GIPAHIGAYON sa City Price Coordinating Council (CPCC) ang ‘calibration’ sa mga ‘Timbangan ng Bayan’ ug random inspection sa mga timbangan sa nagkadaiyang stalls diha sa Carmen Public Market adlaw’ng Huwebes, Oktubre 13.

 

Atol sa calibration, nasayran nga ‘accurate’ kon insakto pa gihapon ang mga timbangan diha sa meat, fish, ug vegetable section pinaagi sa pagbutang og lain-laing mga ‘weights’ nga maoy basihan sa pagdeklara kung depektibo ug kinahanglan na i-recalibrate ang maong timbangan.

 

 

Ang calibration ug random inspection gipangulohan sa CPCC, DTI, City Economic Enterprise Department, City Treasurer’s Office, Agricultural Productivity Operations Office, Xavier University Economic Society, mga opisyales sa market vendors association ug uban pang buhatan.

 

Gisundan kini sa usa ka Information/Education Campaign (IEC) ug Consumer Quiz Bowl diin gipalapdan sa mga personahe sa Department of Trade and Industry ang kahibalo sa mga mamaligyaay mahitungod sa ilang mga katungod ug responsibilidad isip konsumante.

 

Gipasabot usab ni CPCC Co-Chairman Atty. Jose Edgardo Uy nga importante nga mapasabot ang katawhan sa consumer rights aron mas magmabinantayon ang mga mamalitay atol sa pagpamalit og mga produkto sa kamerkadohan.

Tumong sa maong kalihukan nga matabangan ang mga konsumante ingon man ang mga negosyante sa dakbayan isip usa sa mga lakang sa pagpatuman sa economic recovery agenda ni Mayor Rolando ‘Klarex’ Uy. (SPPalen/Photos by Jay Arancon/Layout by Rod Constantino)