GIPAHIGAYON Oktubre 13 sa city hall quadrangle ang ‘mass registration’ sa Philhealth KonSulTa (Konsultasyong Sulit at Tama) program sa mga empleyado sa city hall pinaagi sa City Health Insurance Office pinangulohan ni Dr. Efren Celeste uban sa hugot nga suporta sa Philippine Health Insurance Corporation Regional Office 10 ubos ni Regional Vice President Mr. Delio Aseron II.

 

Ang Philhealth KonSulTa program tipik lang sa pagpatuman sa Universal Health Care Law diin hugot usab nga gisuportahan ni Mayor Rolando ‘Klarex’ Uy sanglit usa ang Cagayan de Oro sa mga advanced integration sites niini.

 

Dumduman ubos sa administrasyon ni Mayor Klarex, pormal nga gibuksan isip KonSulTa provider ang Lumbia infirmary, Carmen health center, Nazareth health center ug City Health Office, ug sa dili madugay mosunod na usab ang Lapasan ug Tablon health centers.

 

 

Samtang, ang JR Borja General Hospital na-accredit na isip KonSulTa provider sa milabay’ng tuig.

 

Ang Philhealth KonSulTa package ang mas gipaladpan nga primary care benefits nga nakatutok sa paghatag og outpatient health services sa katawhan pinaagi sa konsultasyon sa doktor, health risk screening & assessment, 13 select laboratory ug 21 select drugs & medicines.

 

Sigon ni Mr. Abdul Obedi S. Alip, Social Insurance Officer III sa Philhealth X nga kini pa ang unang higayon nga mihimo og ‘mass registration’ alang sa KonSulTa program ug pinaagi sa hugot nga partnership sa rehiyon ug sa kagamhanang lokal sa Cagayan de Oro sa ngadto-ngadto makapahigayon usab og ‘mass registration’ sa mga barangay. (AGP/Photos by Reynan Baylin/CIO)