SUBLING gihangyo ni Mayor Rolando ‘Klarex’ Uy ang kooperasyon sa mga operators ug tag-iya sa bars, restobars ug susamang lugar sa pagtuman sa mga gabayan sa kagamhanan sa dakbayan.

 

 

Gani man, mismong si Mayor Klarex Uy ang nangunay pagpangulo sa usa ka enforcement and inspection sa Regulatory Compliance Board aron mapadayag sa mga negosyante ang iyang hangyo nga tabangan ang syudad diha sa pagpahapsay sa kahusay ug kalinaw sa syudad.

 

Lakip sa hangyo ni RCB Chairman Atty. Jose Edgardo Uy ug ni Mayor Klarex Uy nga limitahan ang pagbaligya sa ilimnong makahubog ngadto sa mga customers nga ubay-ubay na usab ang nainom, ug ang pagpahinay sa live band o’ party music pag-abot sa tungang-gabii.

 

Gisuta usab ang matag establisemento kung kompleto ba kini sa mga dokumento sama sa business permits ug uban pang rekisitos sa pag-operate sa mga business establishments.

Isip suporta sa lakang sa lokal nga kagamhanan, miuban usab sa kalihukan si Kag. George Goking, Kag. Yvy Emano, Kag. Jose Pepe Abbu, Jr. ug Kag. Aga Suan.

 

Kahinumduman nga ikaduhang higayon na kini nga miuban si Mayor Klarex Uy sa maong kalihukan sukad sa pagsugod sa iyang termino nunot sa tinguha nga magmalampuson ang economic recovery agenda sa iyang administrasyon. (SPPalen/Photos by Reynan Baylin/Layout by Rod Constantino)